My Favorites I مفضلاتــي ♥

السلام عليكم ♥

اتأخرنا عليكم هذي المره .. و رجعنا بموضوع خفيف ومفضل عند الجميع 

"مفضلاتي" .. حاولت تكون عامه وتشمل كثير اشياء عشان تناسب ذوق واهتمام

اشخاص اكثر ..

(1) Bath Salt Hibiscus

عبارة عن املاح البحر الميت و مستخلصات زهرة Hibiscus وزيوت من ضمنها فيتامين E 

تحطيها في البانيو على موية حارة او دافيه .. وممكن تستخدميها للرجلين في البديكير 

له فترة عندي ومااستخدمته الا قبل اسبوعين تقريبا .. والنتيجة واو 

إسترخاء مو طبيعي كأني مسوية مساج ! من جد عضلاتي مسترخيه والحلو ان جسمي رطب مره

بسبب الزيوت الموجوده فيه فـ ما احتجت ارطب بعد الشاور ..

الشركة احبها مره  MAJESTIC PURE اطلبها من امازون .. العلبة مليانه وحجمها ممتاز

وحتعيش عندي فترة طووويله ان شالله ..وراح يكون روتين شهري على الاقل 

(2) مقشر Cure

منتج كوري مائي مكوناته طبيعيه بالصبار ويناسب كل انواع البشره 

يزيل الجلد الميت ويقشره من كل مناطق الجسم ( الاكواع والركب والوجه حتى المنطقة الحساسه )

مع الاستخدام يوحد لون البشره .. ويفتحها ويخليها ناعمه ..

فالبداية لما جربته حسيته عادي زيه زي اي مقشر لكن لما استخدمته على وجهي

حبييييب النتيجة مره لان التقشير ناعم جدا وخفيف ف مايتعب البشره وحسيته ممتاز قبل المكياج او بعده 

لكن للمناطق الثانيه النتيجة عاديه كانت معايا ..

طريقة استخدامه حلوه وسهله : 

تحطيه ع المنطقه وتعملي لها مساج وخلال دقيقه راح تلاحظي ان الجلد الميت اتبلور وطلع 

وبعدها تغسلي بالموية المنطقه وشوفي النتيجة الواو ..

طلبته من الانستقرام من حساب : @Star_Shop1

سعره 170 

(3) Toner Botanics

تونر منظف لجميع انواع البشره بالورد خفيف على البشره احبه بعد الدوام احسه يهدي بشرتي 

بعد الشمس ..بعد الغسول من نفس النوع (مالقيته لما جيت اصور ) 

 من صيدلية بوتس سعره شي وثلاثين ريال 

حبيت المجموعه .. وراح اكرر شرائها لما تخلص 

(4) مجموعة الشيا من Bath&Body 

من اليمين كريم لليد مناسب للشنطه مره وسعره رخيص جدا وريحته تهوس (عندي يمكن 9) !!

للاسف مو دايما الاقيه 

وع اليسار شاور كريم .. تحطيه وتغسليه بموية كـ آخر خطوة ف الشاور

والريحه تجلس معاكي فترة طويله 

والصابونة كانت عندي وانتهت ترطيب ممتاز جدا وحجمها كبير جدا ويعيش 

كل المجموعه احبها.

(5) Vitamin C SERUM 

الفيتامين سي فـ حياتي صار جزء لا يتجزأ منها .. روتين يومي 

وانتهى النوع الاول اللي عندي ولحبي للشركة هذي طلبت منهم هذا السيروم (فيتامين سي خام ) لحاله

ممتاز والكمية اكبر من اللي كانت عندي و ارخص 

مايحتاج اتكلم عن فوائده اتكلمنا عنها قبل كذا في تدوينة سابقة هنا

من شركة MAJESTIC PURE

من امازون 

(6) Vitamine E COCOA BUTTER

كريم مرطب جدا بخلاصة الشوكلاته مع الزيوت .. بعد الشاور ترطيب رائع

والريحه تهوس .. من نزيه سعرها مره رخيص بس مااتذكره

واعتقد فيه فكل الصيدليات .. وفيه منه بالتوت إن شالله راح اجربه

(7) ماسكرا ScandlEyes من RIMMEL

جربت كثير وقليل .. اخرهم مسكرا لورا مارسيه على قد المدح وماطلعت بنتيجة هذي المسكرا

اول مره اشتريتها من صيدلية بوتس كنت مسافره وضاعت مسكرتي 

وكانت احلى صدفه من بعدها ادمان .. كنت الاقيها ف صيدلية النهدي ب 45 ريال 

وفجأه انقطعت .. ولقيتها في حساب @Star_shop1

ب 35 ريال بس 

كل مره يسالوني الناس اذا كنت مركبه رموش .. تكثف مره مره وتطول 

اعشقها.

(8) عطر فواحه اسمه وهج 

من الماجد .. مااعرف اوصف روائح بس تستاهل تشموها وتجربوها

سعرها 20 ريال .. نصيحة اشترو كم حبه سوا

عشان لا تندمو زيي .. مخليه اخر نقطة لين اروح اشتري كمية منها 

(9) روج Inglot رقمه 411

التصوير ظالم اللون .. ع الحقيقه يعطي على موف اكثر من البينك 

اللي احبه بهذا اللون مع الميك اب يعطي شكل حلو ومن غير ميك اب برضو

مايعطي الوجه شكل باهت زي الالوان الفاتحه عموماً

(10) كونسيلر Fake UP من بينفيت 

واضح من شكله قد ايش استهلكته .. لين انحفر ومستخسره ارميه 

خفيف مره ومايخطط وكمان معالج لانه من مكونات طبيعيه ( التفاح ) 

احب احطه فالدوام لاني مااتمكيج اصلا ويعطي شكل طبيعي كاني مو حاطه شي 

له دهر عندي ( يعيشششش)
وهذا شكله الطبيعي .. الجهه البيضا معالج ومرطب وفالنص اللون 

(11) مناكير OPI 

هذا المنتج ماكان في بالي صراحه بس كنت حاطته وقت التصوير وقلت خليني احطه فالقائمه 

لانه من جد اللون يناسب صيف وشتاء والشركة هذي اتعب اقول ممتازه

اعتبرها احسن شركة .. الكمية كبيره وماينشف مع الوقت ابدا ( هذا اللون له عندي 3 سنوات )

تلاقوها في سيفورا ونزيه وسعره ممتاز 
إسمه : Berlin there dont that 
G13

هذا اللون على اليد باين اوضح

(12) اخيرا 

ومن باب ان الجمال الداخلي اهم من الخارجي راح احط لكم افضل رواية قريتها هذي السنه

للكاتب / محمد صادق اتحولت لفيلم سينما هذي السنه .. الافضل تقرأوا الرواية قبل الفيلم

التفاصيل اللي فيه احلى وخيالك دائماً احلى من الواقع 

تتكلم الرواية عن محاضرة اخيره مدتها ست ساعات ويتكلم فيها المُحاضر عن المراحل السبع ( هيبتا ) 

مستحيل تتوقعوا نهاية المحاضره .. ومستحيل ما تشوفي نفسك في اي مرحلة من المراحل

او عشتيها .. الرواية تلامس القلب مره وتدخلك عالم الحب, الامل والالم 

وصعب اتكلم عنها اكثرعشان لا احرقها 

.A Well-read Woman is a Dangerous creature

Lisa Kleypas-  

يارب يكون الموضوع عجبكم وحبيت يكون متنوع قد مااقدر ..

وبالاخير اللي يعجبني مو شرط يعجبك ♥

ارائكم تهمنا وننتطرها لـ نستمر

منتجات احبها !

السلام عليكم 

كيفكم و كيف رمضان معاكم ؟ 

أنا عن نفسي مو ملحقه اسوي اي شي خارج نطاق البيت والعائلة

اليوم الموضوع راح يكون شوي غير راح اقولكم عن شغلات منوعة أحبها جدا 

أو احسها مفيدة فلو عجبتكم شغلة منها او تكونوا تعرفوها من قبل بس مترددين فيها

تعالو معايا نشوف 

من اليمين قطرة عين مرطبة ما أستغني عنها بما اني ما استغني عدسات النظر .. ترطيبها عالي موجوده في الصيدليات* 

حتى لو ماتلبسي عدسات تقدري تستخدميها مدام عينك جافه 

زيت شجرة الشاي من بودي شوب ينزل على شكل قطرات فوائده كثير للبشره المعرضه للحبوب انا اذا طلعت لي حبه اخذ منه بعود اذن وامسح على الحبه فقط ما احط على البشره كامله لان ينشف البشره غير كدا ممكن تخففيه و تسوي به حمام مائي لرجولك يشيل الفطريات و الروائح الكريهه و تحسي المسامات تفتحت,

عاليسار  قطرات النظارة الذهبية من كلارنس حلوه للناس الي تحب تعطي بشرتها لون حيوي أنا موبيضاء و مع ذلك بسبب عدم خروجنا في الشمس احس اوقات ان لوني باهت ف جات هذي القطرات و حلت لي الموضوع احط منها قطره على كريمي الي احطه على جسمي  وادهنها تاني يوم اتحمم  يكون اللون طبيعي مو زي باقي منتجات السيلف تاني حتى الريحه اخف مو مزعجه.

فرشاة بلاستيكيه من سيفورا ما اتذكر سعرها  بمية وشي او أقل 

جدا مفيدة للماسكات و مستحضرات العنايه
 اولا ما تحطي اصباعك او فرشه و فيها شعر و بالتالي ممكن يتوسخ نفس المستحضر

ثانيا حتخليكي تتحكمي بالطبقه الي تبي تحطيها و انك ما تاخدي من المستحضر اكثر من المفترض

ولانها بلاستك سهل غسلها و تعيش معاكي فترة جدا طويله

المناكير هذا جدا جميل مو بس اتكلم عن اللون حتى الماركه نفسها رخيصه و جودتها كويسه الفرشة عريضه فمريحه بالاستخدام و بسرعه تخلصي  تلاقوها في محلات طيبه للي في الرياض 

ايلاينر من ميبيلين اشتريته من فتره بحدود 9 دولار عالنت بس اكيد موجود هنا حلوه و سهل بالرسم اذا انتي مستعجله مو النوع الي  بعد ماترسمي يسير شفاف ولا هو اسود زي سواد ايلاينر محمود سعيد  يعني حلو لاستخدام يومي سريع 

صورت شكل الريشه للتوضيح 

بالاخير عاليسار كونسيلر+ هايلايتر من soap & gloary 

 حلو كمان استخدام سريع ينور منطقة تحت العين اذا  يوم صحيتي وتحسي انك تعبانه

تغطيته تعتبر خفيفه لمتوسطه تركيبه جدا خفيف سهل تدمجيه باصابعك 

صراحة ما دورت عليه هنا لانه اصلا جاني هدية بس بدور عليه لان لما يخلص اكيد راح اشتريه 

اخر منتج هو عباره  عن عطر او معطر متعدد الاستخدام ريحته جدا جميله للناس الي تحب ريحة الزهور مثل الاوركيد و الياسمين

وغيرهم و فواح بشكل ! يعني عادي ابخ بخه وحده في غرفتي و الريحة توصل لباب البيت و بدون مبالغه احيان برا البيت 

تقدري تستخدمي كعطر لملابسك اثاث او للجو او حتى عطرك

 موجود في سوق دوت كوم اكتبي في مربع البحث زنبق ويطلع لك

بالاخير اتمنى عجبكم البوست 

في التعليقات اش الاشياء الي ماتستغنوا عنها

واذا جربتوا شي من الي تكلمنا عنه