DermaRoller حل جميع مشاكل بشرتك ..

السلام عليكم ورحمة الله وبركاته ♥

Derma roller

رغم كثرة طرح الموضوع في كل مكان بس لين اليوم فيه ناس ماتدري ايش يعني

او تقول الاسم مو غريب عليا وتعتقد انه كريم او جهاز ..

ايش ال Derma roller  بـ إختصار ؟

هي (اداة) يد بلاسيتيكيه فيها بَكرة عليها إبر صغيرة جدا مصنوعه من الستانلس ستيل (غير قابل للصدأ) وتختلف احجام الإبر فيها حسب الاستخدام الاداة هذي فاااضيه مافيها كريم او أي مستحضر !! و Derma rolling  هو اسم التقنيه نفسها وهي امنه جدا ومرخصه من هيئة الغذاء والدواء الامريكية  FDA وتناسب جميع انواع البشرة ( رجال-نساء) وللحوامل ..

ايش فايدة Derma roller ؟

1-      تهيئة البشرة قبل استخدام أي كريم او منتج للعناية لانها تساعد على امتصاص أي مستحضر بنسب

عالية اعلى من النسبة الطبيعيه ب 40 مره !

2-      علاج اثار الحبوب الحمراء , الندبات والحفر

3-      تخفيف السيلولايت ويعطي جلد املس اكثر.

4-      تخفيف الـ STRETCH MARKS الحمراء والبيضاء بعد الحمل والتغير في الوزن

5-      تحسن من مظهر التجاعيد ( الشيخوخه – التعبيرية ) وتقليل المسامات الواسعة.

6-      تخفف من التصبغات والكلف والهالات 

7-      تساعد على نمو الشعر في الرأس ( الفراغات)

8-      إنتاج الكولاجين وهذا اشوفه اهم فائدة للجميع حتى لو بشرتك مافيها أي عيب او مشكلة تعاني منها..

كل ماكبرنا في العمر يبدا الجسم يقلل من إنتاجه لمادة الكولاجين .. هذا الفرق بين بشرتك

وبين بشرة بنتك اللي عمرها سنتين !

اثبتت الدراسات ان تقنية الديرما رولر في جلسة وحده ممكن تنتج كولاجين بنسب توصل ل 1000%

من الانتاج اليومي !! الكولاجين مادة طبيعيه تفرز فالجسم لا يمكن اخذها من كريمات او زيوت

موضعيه لان البشرة ماتقدر تدخلها لجوا الجسم عشان يستفيد منها ! فـ الفائده حتكون موضعيه

لو حطيتي الكريم  ع الخد اليسار اللي حيستفيد الخد اليسار فقط . تقدري تعوضي نقص الكولاجين بالكبسولات و الامبولات المنكهه .. لكن معاها مكملات ثانيه اللي ممكن تفتح الشهيه..يعني نجلس ع الطبيعي احسن :d

اتمنى اكون وصلتلكم صورة واضحه عن الكولاجين.

انتهينا من الفوائد لو لقيتي انك تحتاجي التقنية هذي لو لسبب واحد من اللي ذكرته فوق

كملي معانا

ايش احجام Derma roller  ؟

مو حجم الاداة نفسها هو حجم الابر لان كل حجم لاستخدام معين وفيه احجام متعددة تبدأ من

0.2mm  الى 2.5mm  

الاحجام الصغيره من 0.2الى  0.5

تنفع للي ماعندهم مشاكل في البشرة بس يبغو نضارة وتجديد لخلايا الجلد والتصبغات والكلف وهالات حول العين (الاحجام الكبيرهممنوعه لحول العين منع باتاً) ..ولتنبيت الشعر وفالغالب مافي أي الم منها

الاحجام 1  الى 1.5  :

لاثار حب الشباب والحفر البسيطه والمتوسطة والسيلولايت والسترتش ماركس والتجاعيد

والمسامات وهذي الحجمين اللي استخدمتها .. مقاس 1mm كانت بداية استخدامي

لين جلدي اتعود ع الالم البسيط جدا بعدين بديت استخدم 1.5mm ومازلت استخدمها ..

الاحجام 2  الى 2.5  :

حتكون مفيدة جدا للي عندهم حفر عميقة او سترتش ماركس قوية ونتائجها اسرع

من الاحجام الاصغر .

وهذا جدول يوضح المقاسات مع الاستخدام ونصيحة ايش ممكن تستخدمي لكل مشكلة :

كيف استخدم Derma roller  ؟

اول شي تغسلي وجهك بغسولك اليومي وتنشفيه كويس بعدين تبدأي

(لا انصح ب إستخدام المخدر الموضعي ) الالم مفيد راح تعرفي متى توقفي ومتى تستمري

مع المخدر ممكن تجرحي بشرتك ويسير جروح او خدوش لا سمح الله وانتي موحاسه والالم محتمل جدا جدا !!

تمرري الديرما رولر في اتجاهات (فوق لتحت- تحت لفوق) خمسة مرات ( يمين يسار-يسار يمين ) خمسة مرات

هذي صورة طريقة التمرير

لين المنطقة تحمَر ومع الاحجام الكبيرة ممكن تشوفي نقط دم !

وهذي صورة خدي بعد الإستخدام

بعد ماتخلصي تحطي السيروم المناسب او الكريم او الزيت اللي حابه تستخدمية انا استخدم سيروم فيتامين سي

لحاله واحيانا سيروم (Vit C + Hyaluronic acid + Vit E + jojoba oil) مع الهيلورونيك احيانا احس بتقشر في بشرتي .. ف احط هذا السيروم اربع مرات اسبوعياً فقط ومرتين فيتامين سي لحاله .. ومرة موية ورد باااارده.

واحيانا اسوي الديرما مرتين يومياً وفالاغلب تكون المره الاولى موية ورد وتكون

 بداية اليوم لما اكون جالسه فالبيت ماحطلع ..وعشان ازيد من فاعلية الفيتامين سي اخذه مع كبسولات

1000 مج عشان اخذ الفائدة مضاعفه وبشكل اسرع من السيروم لحاله!
وارطب وجهي فالايام اللي احس وجهي اتقشر واوقف فيتامين سي 

بعد ماتنتهي تعقميها بالاخص اذا كان احد بيستخدمها معاكي او انك بتستخدميها لاكثر من منطقة فجسمك

تعقميها في موية وديتول وتخليها تنشف او تمرري الديرما على مسحة طبيه ( كحول )
(الافضل ماتشاركي الديرما رولر مع احد ) 
مثلها مثل فرشة الاسنان !!

من فين اقدر اجيب Derma roller  ؟

انا طلبتها من امازون وكانت بكج حجمين إبر مع بعض سعرها كويس جدا ورخيص بس المشكلة احيانا يكون سعر شحنها اغلى منها ! تقدرو تلاقوه في الصيدليات المتخصصة فالجلدية زي نورا و ادما

ومحلات التجميل وتاجرات الانستقرام ماقصرو ماشالله ..

تجربتي الشخصية مع

 Derma roller   

  

انا كنت استخدم علاج روكتان لحب الشباب والحبوب اللي طلعتلي بعد العلاج تركت اثار وحفر كثيره

رغم ان الحبوب اللي قبل العلاج ماكانت تترك حفر والاثاركانت حمراء ! هذي الاثار ماتروح بكريمات التفتيح او التقشير

دكتوري قال مالك حل غير الفراكشنال ليزر بعد سنة من اخر حبة روكتان اخذتيها ..

وهذا شي جدا صعب لاني انتهيت في رمضان وماكنت حابة ابدا يجي العيد وبشرتي بهذا الشكل وماكان عندي حل

وقررت ابدا بالديرما رولر لانها شي امن جدا ومامنه خطر ان شالله ولا اضرار لين يجي الوقت

اللي اقدر اسوي فيه فراكشنال ( ح نتكلم عنه في بوست ثاني كانت لي تجربة فيه قبل الروكتان )

ابتديت بـ مقاس 1 وبعدها ب اسبوع استخدمت 1.5 

والحمدلله خلال اسبوع واحد بان الفرق ولقيت مظهر الحفر خف والبقع الحمراء والاثار والكل لاحظ هذا الشي

ومن يومها سار روتين يومي مااقدر استغنى عنه ابدا لاني حسيت فعلا بشرتي كانت مدمرة

ورجعت تتجدد وتعيش من جديد ..

نصائح عامة :

* لو حتستخدمية للتشققات والسيلولايت تقدري تحطي زبدة شيا تذوبيها لين تصير زيت وبعد الديرما رولر تسوي مساج للمنطقه

او Bio Oil او فيتامين E ..

* لو حتستخدميها للهالات بس من الطرف مرري الرول وبشكل خفيف لانها منطقة حساسه جدا وتقدري تحطي 

فيتامين E او زيت جنين القمح ..

* لو حتستخدميها للمسامات الواسعه بعد الديرما اضغطي بقطنة موية ورد عشان تنقفل المسامات 

* الحامل تقدر تستخدم احجام متوسطه لمنطقة المعده وبعدها تدهن بزبدة الشوكلاته او الشيا 

*لا تستخدمية على الجبين او حول العين او اي منطقة الجلد فيه رقيق ممكن يسبب جرح (المقاسات المتوسطه)

فالاخير هذي صورة مبسطة لشكل الجلد بعد الديرما رولر وكيف 

راح يزود امتصاص اي منتج تحطيه بعده

أي استفسار تحت امركم ونتمنى نكون افدناكم ♥♥

(إن اخطئنا فـ من انفسنا و إن اصبنا فـ من الله )