طريقة التسجيل في موقع Netflix .. واهم مميزاتهم

السلام عليكم ورحمة الله وبركاتة

ح اتكلم عن موضوع مختلف شويه عن اللي اتعودتو عليه مننا ..

 بس ب اول تدوينة ذكرنا اننا حابين تكون مدونتنا لايف ستايل عموما

وحياتي المسلسلات جزء مهم فيها .. وللاسف ما الاقيها ب ـ جودة عالية فكل المواقع والاعلانات تطفشني ولسه الحلقة ما بدأت "اونلاين"

فـ كنت من اسعد الناس لما تم افتتاح نتفليكس للشرق الاوسط .. ح احكي لكم قصتهم قبل ما اقولكم ايش النتفليكس 

للناس اللي مو عارفينه طبعا ..

هو موقع يعرض فيه افلام ومسلسلات و وثائقيات وبرامج مؤخرا صارت ايضاً تنتج الاعمال بنفسها 

انشئت من عام 1997 وكانت تأجر الافلام عبر البريد توصلك وبعد ماتنتهي منها ترجعها (قديماً ) 

اتطورت الشركة وزاد عدد المشتركين واتعدو 400 مليون مشترك بس في امريكا ..

وفي يناير هذا العام 2016 افتتح الموقع في الدول العربيه ( ماعدا سوريا )

"قصة كفاحهم مُلهمه .. من تأجير افلام الى شركة انتاج كبيره وضخمه "

ايش الاجهزة المشغلة ؟

آبل – اندرويد ( الجوال – تابلت ) – مايكروسوفت – بلاك بيري واجهزة كثيرررة

يعني تفتحوه من الجوال او اللاب توب او الكمبيوتر المكتبي او الايباد 

نجي للمهم 

طريقة التسجيل فيNetflix 

جدا سهله وغير معقدة

1-      دخول الموقع من هنا

او تحميل الابلكيشن موجود في الاب ستور و play

تغيير اللغه من تحت للعربيه اذا حبيت

2-      تسجيل مستخدم جديد ( اضغط على اشترك مجاناً لمدة شهر )

3-      اختيار نوع الخطة ( بعد إنتهاء الشهر المجاني ) يكمل على الخطة اللي اخترتها

تضغط تعرف على الخطط

اعتقد القياسي اختيار معقول للجميع لتوفر جودة HD وممكن شخصين يستخدموه " في نفس الوقت "   

وسعره تقريبا 38 ريال شهرياً

بعد إختيار الخطة تنزل تحت وتضغط المتابعه

بعدها تجي صفحة وضع الايميل والباسوورد اللي راح تستقبل عليه التنبيهات في حالة

قرب إنتهاء اشتراكك .. او تحديثات في برامج او مسلسلات الموقع

آخر خطوة 

   

الدفع الخطوة الاخيره وحبيت تنبيهاتهم ان ماراح يسحبو فلوس بعد الشهر المجاني الا لما ينبهوك قبلها ب ثلاثه ايام

عشان اذا ماحبيت الموقع تقدر تلغي الاشتراك مجانا وكسبت انك اتفرجت شهر مجاني 

بس عشان يكتمل التسجيل لازم تحط رقم بطاقة إئتمان او PayPal 

وبس تقدر تدخل وتتفرج 24\24 ساعه 

مميزاتهم بالنسبه لي :

الحلو والمميز في نتفليكس عن باقي المواقع المشابهه تنوع المحتوى 

مسلسلات - افلام كل الانواع المعتادة + وثائقية + عروض ستاند اب كوميدي عالمية

وفيه قسم للاعمال الحاصله على جوائز .

* تقدر تسوي اكثر من مستخدم للحساب نفسه .. مثلا ب اسمي و اسم اختي 

*لما ادخل ب اسمي الاقي المسلسل او الفيلم مفتوح مكان ماوقفت عنده يعني ما تنقفل الحلقه او الفيلم

* فيه حساب موجود اسمه الاطفال كل الموجود فيه افلام كارتون وعائليه تناسبهم

يعني أمان للطفل ما يفتح شي الاهل ما يبغوه يشوفو ..

* الخصوصية في الاستخدام المتعدد 

* المسلسلات تنزل دفعه وحده سيزون كامل فنفس الوقت

* مهتمين جدا بـ حساباتهم في سوشيال ميديا ..ويردو على الاستفسارات

والملاحظات .. مهتمين بالعميل ب إختصار

عيوبهم : 

مهتمين بالجديد و مركزين على إنتاجهم فقط .. 

يعني اغلب الافلام الموجودة قديمة .. محبين الافلام مو مره راح يعجبهم المحتوى

وبالمقابل لهم اعمال جديدة رائعه من إنتاجهم وربحانه جوائز هذي السنه وانعرضت لنا

بنفس وقت عرض امريكا ..

اعمال أنصحكم تتابعوها في Netflix :

فيه اعمال كثيره جدا وراح اذكرلكم المميز فقط بالنسبة لي 

مسلسلات 

The Crown - Narcos - Stranger Things - Fuller HOUSE

Gilmore Girls سنه في العمر ..

كل السابقه إنتاجات جديدة وحصريه في نتفليكس وربحت جوائز

أتمنى اكون افدتكم .. ومشاهدة ممتعه 

Paraben Free .. خالي من الباربين !!!

السلام عليكم ورحمة الله وبركاته 

طلبتو اننا نتكلم عن الباربين بوجهة نظر طبية "صيدلانية " 

عشان تكوني عارفه الصح من الغلط في كلام النت والاشاعات وكل الكلام اللي ح اكتبه

مرجعي فيه FDA US  " هيئة الغذاء والدواء الامريكية " و The American Cancer Society 

جمعية السرطان الامريكيه 

اغلب المنتجات صارت تكتب وتتفاخر انها خالية من الباربين 

ايش هو الباربين ؟

الباربين هو مادة حافظه تضاف للاكل المعلب "فالاغلب" والمواد التجميليه منها المكياج ومستحضرات الشعر والحلاقه والكريمات وغيرها .. تحفظ المنتج من نمو البكتيريا فيه 

موجود بصورة :

 methylparaben, propylparaben, butylparaben, and ethylparaben

وجود المادة الحافظة مهم جدا فكل المنتجات لسلامتنا طبعا.. ومؤخرا زاد الكلام ان الباربين مادة مسرطنه

Are parabens safe as they’re used in cosmetics? Are they linked to breast cancer or other health problems?

هل هو آمن في المستحضرات ؟ او مرتبط فعلا ب سرطان الثدي ويسبب بالعموم مشاكل صحية ؟

الباربين يرتبط بـ مستقبلات الاستروجين والاستراديول الموجودة بجسم الانثى 

فـ زيادة كميتها في الجسم " بشكل كبير جدا جدا" ممكن نظريا تسبب سرطان ثدي ومن هنا جات اشاعة ان الباربين مسبب لسرطان الثدي

رغم انه يحتاج الجسم كمية كبيرة عشان يبدا يسبب اورام او سرطانات وبالغالب الكميات المضافه تكون جدا بسيطة في كل مستحضر ..

وعمليا تمت الاختبارات على الفئران في المختبرات ولقو ان الباربين ما أثر على البويضات المخصبه ( الإناث)

وهو دليل على عدم تأثر الهرمون الانثوي ب الباربين .. و على الفأر الذكر ما اختلف عدد الحيوانات المنويه

ولا اتأثر منه ..

وماظهرت أي حالة بشريه اتاثرت من الباربين وإلا كان تم منع اضافتها من الـ FDA  الامريكية 

واثبتت الدراسات ان الباربين اضعف بـ 10 الاف مره من بعض الاغذيه الغنية ب هرمون الاستروجين !!

ونتناولها كل يوم بشكل طبيعي .

مين اللي انصحها تبتعد عن المستحضرات المحتوية على الباربين ؟

اذا عندك سرطان في الثدي او الرحم او أي اورام ابتعدي عنها تماما لان اساس العلاج يكون بمنع 

الاستروجين انو يتكون في الجسم " حتى لو كانت بكمية بسيطة زي الباربين " 

لان أي وجود للاستروجين ممكن يكبر الورم او يزيد الحالة سوء عافانا الله و إياكم وابعد عننا الامراض

غير كذا .. 

استخدمية بكل راحة وامان إن شاء الله " .. وقبل كل استخدام لاي منتج اتعودو دائما على قول

"بسم الله الذي لا يضر مع اسمه شئ في الارض ولا في السماء وهو السميع العليم "

حبيت اختصر قد مااقدر ويكون الكلام مفهوم وبسيط يفهمه الجميع 

احيانا الغرض من الاشاعات تسويقيه بحته .. يذمو في منتج معين ويقلبو الشي العادي لمضر عشان منتجهم 

ياخذ حقه من التسويق والمستهلك يختاره .. حلو نكون واعيين ونفهم قبل ما نصدق أي شي

فيه شركات اختارت تكون في الـ SAFE SIDE  وصارت تكتب على منتجاتها خالي من الباربين 

عشان لا تخسر مستهلكين مو عشان الباربين مضر ..!! ونلاقي ان الشركات اللي كذا شركات كبيرة ومرموقة 

مو حابة تخسر عشان "مادة حافظة " لو بدلوها بـ أي مادة اخرى لو اغلى شويه ماراح يفرق 

لان الباربين رخيص فـ نلاقيه في اغلب المستحضرات وتختاره اغلب الشركات ..

فقط الشركات الكبيرة اللي عادي بالنسبه لها تغيره حتى لو بشي اغلى 

اتمنى الفكرة وصلتكم واستفدتو من الكلام 

حاضرين لجميع استفساراتكم هنا او على انستقرام 

" إن اصبت فـ من الله .. وإن اخطئت فـ من نفسي "

My Favorites I مفضلاتــي ♥

السلام عليكم ♥

اتأخرنا عليكم هذي المره .. و رجعنا بموضوع خفيف ومفضل عند الجميع 

"مفضلاتي" .. حاولت تكون عامه وتشمل كثير اشياء عشان تناسب ذوق واهتمام

اشخاص اكثر ..

(1) Bath Salt Hibiscus

عبارة عن املاح البحر الميت و مستخلصات زهرة Hibiscus وزيوت من ضمنها فيتامين E 

تحطيها في البانيو على موية حارة او دافيه .. وممكن تستخدميها للرجلين في البديكير 

له فترة عندي ومااستخدمته الا قبل اسبوعين تقريبا .. والنتيجة واو 

إسترخاء مو طبيعي كأني مسوية مساج ! من جد عضلاتي مسترخيه والحلو ان جسمي رطب مره

بسبب الزيوت الموجوده فيه فـ ما احتجت ارطب بعد الشاور ..

الشركة احبها مره  MAJESTIC PURE اطلبها من امازون .. العلبة مليانه وحجمها ممتاز

وحتعيش عندي فترة طووويله ان شالله ..وراح يكون روتين شهري على الاقل 

(2) مقشر Cure

منتج كوري مائي مكوناته طبيعيه بالصبار ويناسب كل انواع البشره 

يزيل الجلد الميت ويقشره من كل مناطق الجسم ( الاكواع والركب والوجه حتى المنطقة الحساسه )

مع الاستخدام يوحد لون البشره .. ويفتحها ويخليها ناعمه ..

فالبداية لما جربته حسيته عادي زيه زي اي مقشر لكن لما استخدمته على وجهي

حبييييب النتيجة مره لان التقشير ناعم جدا وخفيف ف مايتعب البشره وحسيته ممتاز قبل المكياج او بعده 

لكن للمناطق الثانيه النتيجة عاديه كانت معايا ..

طريقة استخدامه حلوه وسهله : 

تحطيه ع المنطقه وتعملي لها مساج وخلال دقيقه راح تلاحظي ان الجلد الميت اتبلور وطلع 

وبعدها تغسلي بالموية المنطقه وشوفي النتيجة الواو ..

طلبته من الانستقرام من حساب : @Star_Shop1

سعره 170 

(3) Toner Botanics

تونر منظف لجميع انواع البشره بالورد خفيف على البشره احبه بعد الدوام احسه يهدي بشرتي 

بعد الشمس ..بعد الغسول من نفس النوع (مالقيته لما جيت اصور ) 

 من صيدلية بوتس سعره شي وثلاثين ريال 

حبيت المجموعه .. وراح اكرر شرائها لما تخلص 

(4) مجموعة الشيا من Bath&Body 

من اليمين كريم لليد مناسب للشنطه مره وسعره رخيص جدا وريحته تهوس (عندي يمكن 9) !!

للاسف مو دايما الاقيه 

وع اليسار شاور كريم .. تحطيه وتغسليه بموية كـ آخر خطوة ف الشاور

والريحه تجلس معاكي فترة طويله 

والصابونة كانت عندي وانتهت ترطيب ممتاز جدا وحجمها كبير جدا ويعيش 

كل المجموعه احبها.

(5) Vitamin C SERUM 

الفيتامين سي فـ حياتي صار جزء لا يتجزأ منها .. روتين يومي 

وانتهى النوع الاول اللي عندي ولحبي للشركة هذي طلبت منهم هذا السيروم (فيتامين سي خام ) لحاله

ممتاز والكمية اكبر من اللي كانت عندي و ارخص 

مايحتاج اتكلم عن فوائده اتكلمنا عنها قبل كذا في تدوينة سابقة هنا

من شركة MAJESTIC PURE

من امازون 

(6) Vitamine E COCOA BUTTER

كريم مرطب جدا بخلاصة الشوكلاته مع الزيوت .. بعد الشاور ترطيب رائع

والريحه تهوس .. من نزيه سعرها مره رخيص بس مااتذكره

واعتقد فيه فكل الصيدليات .. وفيه منه بالتوت إن شالله راح اجربه

(7) ماسكرا ScandlEyes من RIMMEL

جربت كثير وقليل .. اخرهم مسكرا لورا مارسيه على قد المدح وماطلعت بنتيجة هذي المسكرا

اول مره اشتريتها من صيدلية بوتس كنت مسافره وضاعت مسكرتي 

وكانت احلى صدفه من بعدها ادمان .. كنت الاقيها ف صيدلية النهدي ب 45 ريال 

وفجأه انقطعت .. ولقيتها في حساب @Star_shop1

ب 35 ريال بس 

كل مره يسالوني الناس اذا كنت مركبه رموش .. تكثف مره مره وتطول 

اعشقها.

(8) عطر فواحه اسمه وهج 

من الماجد .. مااعرف اوصف روائح بس تستاهل تشموها وتجربوها

سعرها 20 ريال .. نصيحة اشترو كم حبه سوا

عشان لا تندمو زيي .. مخليه اخر نقطة لين اروح اشتري كمية منها 

(9) روج Inglot رقمه 411

التصوير ظالم اللون .. ع الحقيقه يعطي على موف اكثر من البينك 

اللي احبه بهذا اللون مع الميك اب يعطي شكل حلو ومن غير ميك اب برضو

مايعطي الوجه شكل باهت زي الالوان الفاتحه عموماً

(10) كونسيلر Fake UP من بينفيت 

واضح من شكله قد ايش استهلكته .. لين انحفر ومستخسره ارميه 

خفيف مره ومايخطط وكمان معالج لانه من مكونات طبيعيه ( التفاح ) 

احب احطه فالدوام لاني مااتمكيج اصلا ويعطي شكل طبيعي كاني مو حاطه شي 

له دهر عندي ( يعيشششش)
وهذا شكله الطبيعي .. الجهه البيضا معالج ومرطب وفالنص اللون 

(11) مناكير OPI 

هذا المنتج ماكان في بالي صراحه بس كنت حاطته وقت التصوير وقلت خليني احطه فالقائمه 

لانه من جد اللون يناسب صيف وشتاء والشركة هذي اتعب اقول ممتازه

اعتبرها احسن شركة .. الكمية كبيره وماينشف مع الوقت ابدا ( هذا اللون له عندي 3 سنوات )

تلاقوها في سيفورا ونزيه وسعره ممتاز 
إسمه : Berlin there dont that 
G13

هذا اللون على اليد باين اوضح

(12) اخيرا 

ومن باب ان الجمال الداخلي اهم من الخارجي راح احط لكم افضل رواية قريتها هذي السنه

للكاتب / محمد صادق اتحولت لفيلم سينما هذي السنه .. الافضل تقرأوا الرواية قبل الفيلم

التفاصيل اللي فيه احلى وخيالك دائماً احلى من الواقع 

تتكلم الرواية عن محاضرة اخيره مدتها ست ساعات ويتكلم فيها المُحاضر عن المراحل السبع ( هيبتا ) 

مستحيل تتوقعوا نهاية المحاضره .. ومستحيل ما تشوفي نفسك في اي مرحلة من المراحل

او عشتيها .. الرواية تلامس القلب مره وتدخلك عالم الحب, الامل والالم 

وصعب اتكلم عنها اكثرعشان لا احرقها 

.A Well-read Woman is a Dangerous creature

Lisa Kleypas-  

يارب يكون الموضوع عجبكم وحبيت يكون متنوع قد مااقدر ..

وبالاخير اللي يعجبني مو شرط يعجبك ♥

ارائكم تهمنا وننتطرها لـ نستمر

DrugStore Haul (النهدي)

السلام عليكم 

اليوم ح اشارككم مشترياتي من صيدلية النهدي

عشقنا نتفرج على مشتريات الناس ونزود لستة الاشياء اللي نبغاها وفالنهايه نروح نشتري اشياء جديدة

كلكم كذا ولا يتهيألي ؟! 

أفكار للحفلات و تغليف الهدايا

فيه مثل يقول " أنا غنيه وأحب الهدية" 

كلنا نحب الهدايا صغيره كبيره بأختلاف قيمتها الماديه والمعنويه 

عن عائشة رضي الله عنها قالت :
 " كان الرسول صلى الله عليه وسلم يقبل الهدية ويثيب عليها"

وقال الرسول صلى الله عليه وسلم :
 تهادوا تحابوا" وفي رواية " تهادوا فان الهدية تذهب وحر

"الصدر

من هذا المنطلق حلو تهدي الغالين على قلبك حتى بدون مناسبه لو كرت في كلمات معبره 

و الهديه ضروري تفكري فيها و تحاولي تكون شي مميز مناسب للحدث من باب 
 الاتيكيت والذوق مثلا في حال الولادات اغلب الناس تفضل تعطي فلوس او تقدم ذهب او طبعا ملابس للاطفال حسب الميزانية والقرابه مع الوالده اما الملابس حلو تستغلي التخفيضات و تشتري قطع مرتبه و تنفع للجنسين و تخليها احتياط 
اما لو لعروسه الهديه او حتى عريس لو العلاقه قويه ممكن تسأليهم اش محتاجين و تجيبيه لهم اما لو لا انا دايما اقول الفلوس احسن هذي مثال  ..

اضافة حرف العروسه والبوكس الخشب بعد الورد مايذبل تقدر تستفيد
منه وتستخدمه

مثال اخر لهدية لعروسه او حتى خريجه اذا كنتي تحسيها تميل للافكار المبتكرة 

الورد ينشال ومتغلف من تحت بـ سولفان عشان تقدر تطلعه ب سهوله وما يوسخ الهدية 

فنفس الوقت 

العرايس لهم اكبر نصيب اليوم في الافكار بس مو معناه ماتقدري تنفذي الفكره نفسها لاي مناسبة ثانية 

بس صدفت مع الصيف موسم زواجات ماشاءالله ممكن لو ميزانيتك تسمح او رح تشتركي مع صديقاتك تسوو تجمع لكم بصرف النظر اش احتفالكم و تسووو هذي الافكار
  من حفل توديع عزوبية "Bridal Shower"
 صديقتي  

صوره بانوراميه للهديه و الكيكه 

صور اقرب للهدية 

الهدية كانت  (ساعة واسورة ألماس) ناعمه يوميه لان فالاغلب العائلة راح تجيب لها ذهب 

واشياء كبيره تناسب السهرات .. فـ اخترنا شي يناسب شخصيتها لاننا قراب من بعض

ويكون استخدام يومي لها وتتذكرنا فيها دائما

بوكس شوكلاتة من الرائعه @Sweetsour4 

برضو اخترناه بوكس عشان تستفيد منه بعدين ويجلس معاها بالذات انو التصميم ب اسمها ♥

عملنا بوستر تتصور عنده العروسه وقتها كان دوبه طالع ايموجي سناب
 وصممناه وطبعناه كـ بوستر وطبعناه على تي شيرت لها 
وكفر جوال 

 ♥ ♥ وطبعاً الحفلة كانت مفاجئة 
ماكلفتنا كثير وسعادتها ب اهتمامنا ب تفاصيل صغيرة كانت تساوي اكثر 
والحمدلله كانت حفلة جمممميله وعروستنا اجمل♥ 

وصلنا هنا لجزء افكار التغليف
 حاولت يكون واضح و سهل لكم فصورتها و سويتها كـ بيكتوريال عشان توصل الفكره و تقدري تحتفظي فيها لبعدين 

عن نفسي صاير عندي اهتمام كبير بورق التغليف و جودته ف ياريت لو تعرفوا من فين ممكن القى اشكال وخامه حلوه تكتبوا في التعليقات . زي ما انتم شايفين ورق التغليف لما يكون حلو ماتحتاجي تتعبي نفسك كثير بالاضافات 

اما الاضافات سويت لكم اكثر من طريقه كمان تقدروا تتدوروا في بنرتست ملياااان افكار واشكال 

نجي لاول شكل التغليفه باينه هنا الصوره الجايه شرح كيف تسوي 

حاولي تشدي قدر الامكان التغليف و يكون شغلك نظيف عشان النتيجه تكون بيرفكت 

و تثبتي كل خطوه بشريط لاصق من الجهتين عشان ما تنفك عليك كل شويه 

اما الكرت الي شفتوه فـ جبت كرت ابيض عادي و جبت خرامة اطراف بشكل لطيف و خرمت الكرت من كل الجهات 

نجي للفكرة الثانيه في التغليف التغليفه عاديه جدا لكن الفكره في الاضافات 

ضفت لها مروحه عشان حسيتها فلات مره بدون شي 

التغليف ينفع لهدية طفل او شخصيه تحب الالوان والرسوم 

المروحه اضافت لمسة للتغليف وهذي طريقتها جدا سهله 

ورقه مربعه تنقص من الزوايا للداخل بس مو للاخير عشان لا تنقطع 

و تنطوي الاطراف للداخل بحيث تسوي اذرع المروحه 

طبعا يا تثبتيها بلاصق او غرا الي يريحك و اتركي المجال لمخيلتك في اللمسات الاخيره 

حلو الهديه يكون فيها لمسة شخصيه منك

وهذي فكره للمستعجلين 

تقصي ست شرايط بنفس الطول وتطوي النهايتين للداخل بحيث تلتقي في منتصف الشريطه و تثبتيها 

بعدين تسوي زي الصوره ..

فكره اخيره ..

اتمنى يكون اعجبكم الموضوع في افكار كثيره و حلو لما تقدمي الشي تضيفي لمستك الشخصيه عليها لانه حيحس فيها و يقدر هديتك زياده غير انه اصلا ممتع الموضوع 
واحساس ايجابي جميل لما تغلفي بنفسك و تشوفي رد فعلهم عالتغليف والهدية .. 

قولولنا اش عجبكم اكثر شي ؟؟
و لو عندكم افكار اقتراحات لا تبخلوا علينا 
♥ نشوفكم قريب